將近9個月大嘅希晴bb近期愛上玩peek-a-boo! 佢會雙手舉起條紗巾，然後放低對手，跟住有人回應佢，佢就會好開心！
但個傻豬有時就咁舉起條紗巾就算，條紗巾根本未遮住佢對眼，但佢就以為自己成功咗，個樣好搞笑 ＾0＾
成日湊住bb雖然係攰啲，但係佢久唔久都會學識啲新嘢，俾到驚喜我，真係一件好開心嘅事，不過，媽媽開始要返工喇 >_<唔知希晴bb會唔會成日掛住我呢？
愛上peek-a-boo的bb
悠長假期終結了
我斷斷續續差唔多放咗4星期假喇！！一聽到“4星期”，我相信好多人都會非常羨慕我；但其實呢4星期嘅我又忙，又辛苦，又攰！！
我一放假當然首要做嘅嘢就係全職湊女！！而唔知幾時開始，希晴bb就變得愈來愈癡我，唔肯要爸爸，一步都唔肯俾我行開！ 有時我拎轉面飲啖水，be be 已經大喊！！bb咁需要我，有時都會覺得幾心甜，但有時又會想叫“救命”！！ 因為我真係一步都走唔開! 尤其係上兩星期，我開始作病，bb成日癡住我，當然傳染埋佢喇！但佢又唔肯跟住爸爸，結果我病到好攰，好辛苦，都冇得休息，足足病咗成兩星期！！……而bb癡住我呢個病原體，佢都要成個星期先好得返, 真係擔心死我!!
成個假期，有一半時間都病到死死下！唉…….
另外，呢個假期仲要為新屋裝修而頻頻撲撲，又攰，又煩，又要擔心……好慘！！希望來緊一切順順利利，我可以快啲搬就好！！
雖然放咗咁耐，我真係攰到好似冇放過假咁，見到fb好多人都去咗旅行，好羨慕吖！以往我每年嘅暑假都會出國去散散心，就算舊年陀住bb都短短地去咗個澳門，但今年，要睇住bb，加上又冇錢，諗都唔駛諗，只係可以羨慕人地…………唉…唔知我幾時先可以好好放下假呢？
呢個假期, 我無論幾攰都好, 幾乎每日都會揹bebe出下街, 因為我見到bebe每次出街都好興奮, 既然佢咁鍾意去街街, 自己唯有辛苦d喇!! (三十幾度, 揹住個b, 其實有時都幾攰下) 不過, 媽媽返工, bebe又冇得成日去街街喇!! 唔知佢會掛住我多d?? 定掛住去街街多d??
齊齊病倒了
我同bb終於一齊病到了！！經過個幾星期嘅頻頻撲撲，三幾日前，我開始發現自己喉嚨爆痛，跟住仲開始頭痛tim!! 而係呢個時候，我居然發現希晴bb都開始聲沙 >_< 一開始有懷疑過bb係唔係因為喊得多，所以聲沙，但好快就發現bb把聲沙得太唔正常，係非常沙！！由於唔放心，所以唯有帶bb去睇兒科！
醫生話有啲菌係bb聲帶度，所以令佢聲沙！醫生仲寫埋信俾我，話如果bb聲沙情況差咗，或有氣喘，就要入院喎！ OMG!!!! 我即刻諗起上次bb差不多三個月大時入院嘅地獄情況！！ （係我嘅地獄！）今次bb千祈唔好再試！所以來緊呢兩日，我同bb都要好好休息！！
呢支係希晴BB人生第一次食嘅抗生素…….DISLIKE!
我發現原來湊住bb，真係病得好辛苦！！ 自己本身已經唔舒服，而bb又有啲唔舒服，所以特別扭！！唔知係唔係每個bb都一樣，一唔舒服就鍾意癡住媽咪，點都唔要爸爸，爸爸一抱就喊…………結果我幾唔舒服都好，都要氹掂大小姐先有得休息！而bb呢兩日仲要飲返夜奶，真係人都癲！！希望係bb唔舒服時先係咁喇！！
唉………我同bb都要快啲好番先得！仲有好多嘢等住我去忙！！
8個月大的希晴bb
希晴bb今日8個月大喇！！
而家bb食固體已經食得好叻叻，自從6個月開始已經一直食2餐，不過b只鍾意食杰粥，啲粥稍微稀啲，都食到發脾4 >_<
而到目前為止，菜方面，bb已經試食過菜心，菠菜，生菜，莧菜，南瓜，冬瓜，節瓜，紅蘿蔔，蕃薯。肉方面，就食過豬肉，鯇魚，三文魚，大眼雞；仲食過蛋黃，同豆腐。水果方面，就因為bb成日便秘，所以食過不同類型嘅蕉，香蕉，大蕉，皇帝蕉，仲有就係蘋果同啤梨！！
試咗咁多嘢，真係要好多謝婆婆！！佢日頭湊住臭be, 所以我只可以買定啲材料，然後講俾婆婆聽，婆婆就會好有心機慢慢同be be試 ＾0＾當然我每日都要為安排be be 食咩嘢而傷透腦筋！！又要俾佢試下新嘢，又要好味，又要有營養，又要保持均衡嘅飲食……真係少啲智慧都唔得！！而家嘅小朋友真幸福，爸爸媽媽會為佢地嘅飲食大費周章，我相信以前我阿媽啋我都傻！！所以新一代嘅小朋友真係更應該孝順對佢地咁好嘅爸爸媽媽 ＾0＾
我相信bebe有一樣嘢一定遺傳咗佢爸爸 –就係“為食”。而家我地食飯，都要預埋佢一份，因為佢見到人地食嘢，佢就會不停吞口水，咀郁郁，如果唔俾佢食，佢仲會嘈嘈tim!!
所以如果嗰餐有啲啱佢食嘅嘢，如豆腐，面包，就會俾佢食少少！ otherwise, 就俾佢食幾粒bb乳酪餅！be be見到自己有得食，當然即刻展現佢招牌式嘅笑容，笑到得一條線，仲跳晒舞，好搞笑！
8個月大嘅be be仲未識爬，嚴格來講係未識向前爬，佢可以爬向後，但要佢向前，佢只可以用手腳撐起自己個身，然後搖pat pat! 搖兩下，佢又趴低。有時如果特登擺佢想要嘅嘢，想佢爬前去攞，佢就會好奸咁拉啲床單，拉樣嘢埋來；如果都失敗，佢當然就直接發脾4喇！
至於講嘢方面，be be 呢個月都係冇咩進展，都係“吖” “ur”咋……真係好想be be快啲有多啲音！如果可以叫到“媽媽”，就最好＾0＾
BB是左撇子？？
近來發現如果將d玩具放係希晴bb面前, bb大部分時間都會伸出佢嘅左手去攞! 唔知咁樣係唔係代表左手係bb嘅慣用手呢?? 如果係, 咁bb咪會同我一樣囉!! 嘻嘻, 人地話左撇子會聰明d呢!!!
我話俾阿媽聽, 點知佢第一個反應就話第時要教返bb用右手寫字, 佢話左手寫字會阻住同學!!!!!! 唉………佢想當年就係因為相同嘅理由, 迫我用右手寫字, 而家令到我唔可以100%做左撇子, 因為我寫字係用右手!!! 不過, 相同嘅事我唔會俾佢再發生, 因為我會順期自然!! 用左右手都無所謂~~
BB睡不穩
希晴bb近日嘅至愛睡姿由打側瞓 (仲要係側向左)變成趴係度瞓! 起初見佢叭係度瞓都有d擔心, 驚佢瞓瞓下塊面向下, 會透唔到氣! 所以當一見到bb瞓到趴咗係度, 我同肥堅都係抱起佢, 擺返好!! 但bb實在太鍾意趴轉瞓, 轉個頭佢又趴轉咗, 所以試咗幾次之後, 我同肥堅都放棄咗……..我諗bb而家都7個幾月大, 應該冇事卦!!!
另外, bb瞓覺時實在太狂野, 郁來郁去, 轉來轉去!! 有時, 佢自己轉到自己俾床邊卡咗, 就大喊!! 如是且, 一晚喊幾次, 搞到我都冇覺好瞓!! 嗚……嗚…….
BB人生第一次嘅下水禮
7m22d嘅希晴bb終於第一次去游水水！！
BB自一出世開始，就好鍾意沖涼！！好多時都沖到唔肯上水，見佢咁鍾意玩水，所以一直都好想帶佢去游水，俾佢試下玩成個泳池咁多嘅水！
由6月頭樓下個游泳池開，講到今日，終於行動喇！！
全副武裝，準備出發！
今朝成朝都陰天，一心諗住冇太陽，唔駛咁趕，晏少少落去都冇所謂！結果，搞到11點半先落去！！仲要一落到去就開始好猛太陽，真黑仔！不過，搞咗咁多嘢先落到來，冇理由打道回府！！所以都係照游喇！希望千祈唔好曬親 >-<
一落去大池，bb唔知係唔係唔慣，加上有啲驚驚，居然大喊！結果抱佢一陣，呵下，好啲，可以放手，尤得佢自己係水到漂浮一陣；但一陣又喊過……如是且重覆幾次，結果都係喊住上水，結束咗史上最快嘅游泳活動，落水嘅時間15mins都……冇
今次嘅下水禮雖然唔算好成功，不過第一次來講都算係咁，bb都有係水入面乖乖獨自漂流嘅時間！！pass!! 下次再游過！
週末三人行
星期六, 放假日, 最好就係一家三口去街街!!
由於肥堅遲d要獨自去台灣偷歡, 所以有藉口俾我地出”遠門”去兌台幣!!
出得發喇!! (不過由於帶bb出街, 要準備好多嘢, 又片, 又糊, 又餐具, 又外套, 又揹帶, 又bb車……所以臭be瞓咗一覺, 當然只係半個鐘, 但我地都未準備好!!)
出到去, 肥堅當然已經餓到癲咗!! 嗱嗱臨去佢其中一間至愛–太平館開餐!!
我地開餐, bb有咩嘢做?? 咪係搞破壞囉!!
慘俾糟蹋嘅其中一位主角!!
除咗搞破壞之外, 佢仲不停同陌生人笑, 不停瞭人玩, 搞到好多人都話佢可愛!!! 查實大家都俾佢呢個天使嘅一面所欺騙, 佢係屋企就成日扭計計, 係出名嘅「脾氣王」!!
食完嘢, 去下度身又買下嘢, 到bb嘅play time!!
試玩中!!
呢d咁大件嘅玩具, 都係行過時, 試下好喇, 千祈唔可以擺係屋吖!!
就係咁, 出咗來幾個鐘, 又係時間返歸喇!!
唔知點解而家同bb出街, 幾個鐘啫, 已經好攰、好攰、好攰, 不過都好開心同滿足!!!……..但可憐嘅我第二日(即今日), 仲要返工……
期待下一次再去街街!!
令人煩惱的便便
希晴bb嘅便便問題真係令人好煩惱吖!!
自從臭be轉咗食粥仔之後, 佢就開始同便便做唔成朋友, 往往要幾日先有一次便便!! 每次痾都好辛苦, 而呢一個月以來, 仲已經痾損咗4次!! 真係好慘吖~~
我已經試晒所有可行嘅方法!! 又菜、又乳果糖、又香蕉、又蘋果、又蕃薯……但都係差不多~~
可能原因就係因為佢隻曳B, 成日唔肯飲水!! 一見到裝咗水嘅奶樽, 就又推又喊, 發晒脾氣!!! 只肯飲稀釋咗嘅果汁, 連開奶茶都唔肯飲!!! 而我就曾經試過連續兩日每日俾佢飲咗3支稀釋嘅西梅汁, 唔知係唔係因為咁, 搞到臭be肚痾, 仲要痾咗3次吖!!!
唉…….bebe嘅便便問題真係令我好煩惱! 而家平均每星期都見佢痾損一次~~都唔知點算……
平時食得、玩得, 就係偏偏唔痾得嘅臭be!情緒過山車
近日，我嘅心情就好似坐過山車咁，有陣時係高處，可以開開心心，冇咩嘢咁；但大部份時間，我都處於谷底，情緒極度低落！原因？？表面上睇來，有，但解決不了！！ 而深層原因，可能存在，但我唔知道係咩？
想找出路，但找不到，亦無力去找！以為喊一場可以發洩一下，會好過一點，但結果仍舊是老樣子……
太累了，身心皆疲……
每次同bb玩都係我唯一覺得有返啲動力嘅時刻！唯一的……
elvapig 